Giputla'g liog sa ugangan kay badlungon

CEBU, Philippines - Usa ka lalaki ang gilunggoan og liog sa iyang ugangan tungod sa giingong pagkabadlungon niini diha sa barangay Pajo lungsod sa Daanbantayan mga alas 9:30 sa gabii niadtong adlaw nga Lunes.

 Si PO1 Ramil Claro ang imbestigador sa Daanbantayan Police miila sa namatay nga mao si Emelio Mondejar Cuyuca, 42, nagpuyo sa Pajo, Daanbantayan, samtang ang suspetsado mao si Carlos Gastador Punay, 59, amahan sa asawa sa biktima.

 Sigon pa ni PO1 Claro dugay nang di maayo ang tinagdanay sa duha sukad nga makigminyo ang anak sa suspek ngadto sa biktima ug gikatahong sagad sa sinugdanan mao ang pagkabadlungon sa biktima.

 Niadtong Lunes sa gabii, si Cuyuca gikatahong hubog kaayong miadto sa balay sa suspetado nga nagdala og wala matinong armas ug mihagit sa ugangan og patay ug mipabuto sa iyang armas.

 Ang suspetsado wala na makaagwanta mikuha og sundang ug gisundan ang biktima nga padulong nang mopauli ug diha-diha gihapsan ang liog niini hinungdan sa pagkadunghay sa ulo gikan sa liog.

 Human matumba giusban kini og tigbas sa ulo tulo ka higayon, diha sa ulo ug sa dughan hinungdan sa pagkagutad-gutad sa lawas niini ug namatay.

Ang suspek mitahan dayon sa barangay kapitan nga si Leticia Perpetua kinsa mao nay mi-turnover kaniya diha sa kapolisan.

Si SPO3 Cesar Carlos Alburo   sa Daanbantayan nga gikahinabi sa Banat News nagkanayon nga si Cuyoca usa ka ex-convict gumikan sa kasong kalapasan sa R.A.8264 illegal possession of firearm apan naka-probation parole. – BANAT NEWS