'Way' Mayor

CEBU, Philippines - Miduso na og lineup sa mga konsehal ang oposisyon sa dakbayan nga Kugi Uswag Sugbu (Kusug) ingon man kandidatora pagka-kongresista sa South District ang magpapatigayong sportsman nga si Jonathan “Atan” Guardo kagahapon.

Apan atol ning pagsulat sa balita nakapahibulong sa mga sakop sa media ug sa mga nagpaabot sa lineup sa oposisyon mao nga walay kandidato sa pagkamayor ug bise mayor ang oposisyon.

Mitumaw kagabii ang di kumpirmadong report nga dunay isang-at nga kandidato sa maong mga posisyon ang Kusug apan sa uwahing takna na kagabii, gikatahong kini mga “dummy” lamang. Gikatahong usbon ra unya kini sa ilang himuong adjustments sa final lists subay sa patakarang gitugot sa Comelec karong Disyembre 14 nga diin gitugot ang substitution sa mga kandidato.

Mitumaw ang mga balitang ang pilian pagka-kandidato sa pagkamayor mao sila si Winston Garcia o ba kaha si kanhi Mayor Alvin Garcia alang sa Kusug.

Ang lineup sa Kusug pagkakonsehal sa amihanang distrito mao sila si Joel Garganera, Jerry Guardo, Raymund Garcia, Danilo Fernan, Lemar Alcover, Paul Melendez, Patrick Talisaysay ug Atty. Fritz Quiñanola.

Samtang sa habagatang distrito mao sila si Jose Navarro, Danilo Lim, Danilo Teves, Deo del Rosario, Ben Baculi, Milagros Camachu, Anastacio Masong ug Ana Marie Vestil.

Samtang si Guardo sa iyang bahin nagkanayon nga iya unang gihuna-huna kun kinsay labing huyang nga kaatbang sa eleksyon. Gipadayag ni Guardo nga namili una siya kung asang posisyon ang dunay labing huyang nga kandidato ug si Mayor Tomas Osmeña maoy labing huyang ug sayong pildihon.

“He has brought the city down to his knees … we are now the least competitive city in the Philippines..it’s a big shame, and I think it’s about time that we have to bring the Cebuano pride back,” dugang pamahayag ni Guardo.

 Nagtuo ang mayor nga walay laing kadaganan si Guardo gawas sa pagka-kongresista tungod kay kini lang ang magamit niining taming sa kaso nga giatubang nga gisang-at sa Philippine Sports Commission (PSC).

Sa pikas bahin, mi-file sad sa ilang COC sila si Jacinto Iran ug kanhi NBI-7 Director FlorencioVillaren. Ang 79-anyos nga si Iran nga taga barangay Basak San Nicolas, magpapili pagkamayor sa siyudad, samtang si Villaren, magpapili pagka-kongresista sa amihanang distrito sa dakbayan ug kini mao na ang ikaupat ka higayon nga milansar sa maong posisyon.

Samtang mi-file sad og kandidatura pagkamayor sa dakbayan isip independente si Samuel Darza nga kanhi project chairman sa Metro Cebu Development Project nga maoy nagsugod sa katukuran sa South Road Properties. – BANAT NEWS