Tomas nalipay sa taas nga koleksyon

CEBU, Philippines - Gipasigarbo ni Cebu City Mayor Tomas Osmeña ang taas nga tax collection efficiency sa dakbayan sulod sa unang siyam ka buwan niining tuiga.

Ang City government dunay kapin sa P529.2 milyones kun 120.03% nga actual total collections sa real property hangtud sa ikatulong quarter.

Kini naghimo sa kagamhanan sa dakbayan nga numero uno gikan sa 16 ka mga siyudad dinhi sa tunga-tungang Kabisay-an.

Gipasigarbo ni Osmeña ang nakolekta ingon man ang collection efficiency sa dakbayan tungod kay kini mas taas itandi sa performance sa kagamhanan sa lalawigan.

Ang provincial government nakakolekta lang og kapin sa P169.9 milyones hangtud sa third quarter niining tuiga ug adunay 89.53% nga tax collection efficiency.

Kini gikataw-an ni Osmeña tungod kay ang probinsya sa Sugbu nalabwan ug ikaduha ra sa lalawigan sa Bohol sa tax collection efficiency nga adunay 119.28%.

Tungod niini gipa-advertise sa mayor ang nahisgutang statistics nga gikan sa Bureau of Local Government Finance (BLGF-7).

Gipadayag ni Osmeña nga gastuhan sa kagamhanan sa dakbayan ang advertisement alang sa pagpanalipod sa integridad sa siyudad.

Dili makatugot ang mayor nga kanunay lang latuson ug insultuhon sa kagamhanan sa lalawigan hinungdan nga ipakita niini sa publiko ang gipadala sa BLGF-7 kanila.

Nasayran nga ang kagamhanan sa dakbayan, makapila na nahimong numero uno sa tax collection efficiency sa nangaging katuigan.  - Elly Bolonos (BANAT NEWS)