CEBU, Philippines - Ang mga lider sa mga partido politikanhon mao gayud unta ang angayang manguna sa pagpa-drug test una sila mosang-at sa ilang sertipiko de kandidatura alang sa piniliay sa tuig 2010.
Mao kini padayong giawhag ni manlalaban Paul Clarence Oaminal, ang tsirman sa Dangerous Drugs Board (DDB) kinsa nagkanayon nga pait kaayo kung may mga opisyal sa kagamhanan nga nagbisyo sa ginadiling drugas kay mahimo kining sumbanan sa mga molupyo nga utro usab nga hakog sa ginadiling drugas.
Si Oaminal nagkanayon nga niadto pang milabay’ng buwan siya nag-awhag ug mihagit sa mga lider sa dagkong pundok sa politika sa nasud nga angayang magsilbi silang role model sa ilang partido.
Gipadayag niya nga angayang mahibaw-an sa publiko aron dili sila mosipyat sa pagpili og kandidato .
Kini tungod kay anugon kaayo ang boto sa katawhan kun mahipunta lamang kini sa mga tawong magpakauwaw lamang sa katilingban.
Matud pa ni Oaminal nga ang politiko nga nabuang sa ginadiling drugas sama pananglitan sa tiggamitan niini, o kaha nagnegosyo niini, walay tarong nga pamunuan ug angayan lamang nga isalikway sa katilingban tungod sa kadako sa kadaot nga idulot niana sa nasud.
Kini tungod kay matud pa ni Oaminal ang mahimong produkto sa kabuang nianang mga tawhana mahimong tulisan, rapist, ug bangiitang kriminal nga dili na angayang magpabilin taliwala sa sosyidad.
Midugang si Oaminal nga ang usa ka politiko nga walay tinaguang bisyo sama sa paggamit o pagnegosyo sa ginadiling drugas dili angayang mabalaka kun ipahiling nila ang ilang kaugalingon pinaagi sa pagpa-drug test. - Guam P. Logroño (BANAT NEWS)