14-anyos nakuryentihan, patay

CEBU, Philippines - Nabugtoan sa iyang kinabuhi ang usa ka 14-anyos nga lalaki human nakuryentihan samtang nanguryente og isda sa sapa sa barangay Mulao, lungsod sa Compostela niadtong milabay’ng buntag.

Ang namatay giila sa kapolisan nga si Gregorio Maroliña Jr., 14, taga-barangay Licos, dakbayan sa Danao napalgan na lang patay sa iyang amo nga nagkulob sa usa ka sapa sa barangay Mulao.

Usa ka Silvano Laag nga barangay tanod ug agalon sa biktimang si Maroliña maoy nakakita sa batan-on.Si SPO1 Enrique Losbaños, desk officer sa Compostela Police Station nga gikahinabi sa Banat News nagkanayon nga si Maroliña nagtrabaho isip tigbantay sa gamay’ng farm ni Laag sa mga binuhi niining baboy, manok, ug mga tanom. Nagbuwa-buwa na ang baba sa batan-on sa dihang nakit-an nga nagsugod na og kabaho.   - Guam P. Logroño (BANAT NEWS)