'Pinusilay' usa patay

CEBU, Philippines - Patay ang usa ka ex-convict samtang naangol ang usa human sa nahitabong pinusilay sa barangay Dawis Norte lungsod sa Carmen niadtong Domingo sa alas 9:00 sa gabii.

Ang biktima nga namatay mao si Jose Tuico, 60, molupyo sa maong lugar samtang ang kauban niining nag-inom nga iyang gikapinusilay ug naangol usab mao si Rodrigo Morales nga iyang silingan.

Matud pa ni SPO1 Joselito Jopia, imbestigador sa Carmen Police, ang biktima ug suspek nag-inom kauban sa laing barkadang si Rudy Casas, ang naulahi miuna na og pauli.

Sa imbestigasyon sa kapulisan gikan sa pamahayag ni Morales nga nag-inom sila sa biktima niadtong tungora ug dihang nahurot na ang ilang gi-inom gipangayo-an siya niini (biktima) og kwarta aron ipalit og ilimnon. Dihang iyang gibalibaran kalit kining nasuko ug mibunot sa giluklok niining armas hinungdan nga sa iyang kahadlok midagan siya pahilayo.

Apan nakabati siya og sipang buto sa armas ug mao nalang ang iyang nabantayan nga naigo siya sa sampot ug nagpatabang siya sa mga kabanay nga madala sa tambalanan sa Danao. Dunay report nga nagkaaway ang duha niadtong tungura nga misangko sa pinusilay hinungdan nga namatay ang biktima ug naangol usab si Morales. (Darrel Carumba) (BANATNEWS)