Opisyal sa polis naunay sa armas sa sakop

CEBU, Philippines - Samaran ang usa ka opisyal sa kapulisan sa dakbayan sa Lapulapu human kini aksidenteng naigo sa armas sa iyang kaubang polis nga natagak diha sa pikas lawak sa milabay’ng hapon.

Ang biktima mao si Insp. Antonio Detuya, 42, hepe sa Intelligence Section sa kapolisan sa dakbayan sa Lapulapu human maigo sa iyang walang bitiis. Ang gitumbok nga responsable sa maong pagpamusil mao si PO1 Jacklord Pogoy, 29, residente sa barangay Cogon lungsod sa Cordova nga sakop sa biktima.

Base sa pasiunang imbestigasyon ni SPO3 Rex Ibanez nasayran nga samtang natulog si Detuya sa iyang opisina uban sa iyang pamilya kalit lamang milanog ang masipang buto ug nabantayan nalang niyang sakit ang iyang walang bitiis.

Nasuta ni SPO3 Ibanez nga si Pogoy diha sa gawas nga bahin sa buhatan ni Detuya mitarong sa iyang nahuslong pistol belt apan samtang iya kining gihimo kalit nga natagak ang iyang pistola sa holster niini.

Gisuwayan unta kini og salo ni Pogoy apan nasulod hinuon ang iyang tudlo diha sa trigger guard ug napislitan ang gatilyo hinungdan sa pagbuto niini, apan ang bala milagbas sa bungbong ug adto napunta sa bitiis sa iyang opisyal.

Mitahan dayon si Pogoy sa iyang kaugalingon ug sa iyang armas ug mipadayag nga andam niyang atubangon ang silot nga gibunga sa maong aksidente.   (Bong Soriano ug Romeo Limpangog)    (BANATNEWS)