Gipusil sa dispatser kritikal

CEBU, Philippines - Kritikal ang kahimtang sa usa ka construction worker human kini pusila sa usa ka dispatcher sa sitio Plaza Housing, barangay Busay, dakbayan sa Sugbo kagahapon sa alas 6 pasado sa buntag.

Ang biktima mao si Ryan Rallos, 24, nga taga Plaza Housing, samtang ang suspetsado mao si Jaime Minoza, 46, nga taga   PC Hills sa barangay Lahug.

Si Sheena Marie, live-in partner sa biktima nagkanayon nga diha gyud sa iyang atubangan ug sa ilang duha ka anak pusila ang biktima.

Matud pa niya nga nakasulod ang suspetsado sa lawak nga ilang giabangan dihang giablihan niya kay nagpunay kini og tuktok.

Apan dihang iya kining giablihan, walay daghang langas gipusil dayon sa suspetsado ang biktima ug nasabak kini sa nagkalainlaing bahin sa lawas.

Gihatod dayon ang biktima ngadto sa Cebu City Medical Center ug sa pagsulat ning maong balita nagpabilin ang katandugon sa kahimtang niini samtang ang suspetsado gipangita pa karon sa kapolisan human kini moikyas.