Pagkiha sa mayor sinugdanan palang; 9 pa ka Ampatuan naa sa BI watchlists

CEBU, Philippines - Gipahibalo sa gobiyerno nga ang pagpasaka og kasong multiple murder batok ni Datu Unsay, Maguindanao mayor Andal Ampatuan Jr. sinugdanan palang sa tinguha sa imbestigador nga mapalawman pa ang imbestigasyon sa masaker niadtong milabay'ng Lunes sa Shariff Aguak Maguindanao nga mikalas og 57 ka tawo lakip na ang kapin 30 ka tigbalita.

Sa report sa GMA News, ang Malacañang mipagawas niini samtang gitun-an pa sa Department of Justice (DOJ) kung kasong terorismo ang ipasaka batok sa mga Ampatuan ug uban pang suspek.

“This is only the beginning ... All investigation will be conducted regardless of who are involved. Depending on the evidence gathered and warranted by law, charges will be filed and those concerned will be brought to the bars of justice," matud pang Press Secretary Cerge Remonde sa sibyaanang gipanag-iya sa gobiyerno nga dzRB.

“This is what government is doing, in response to President Gloria Macapagal Arroyo’s order to give justice to the victims. This is a heinous crime that has given shame to Filipinos," dugang pa sa Sugbuanong opisyal sa Palasyo.

Sa laing bahin si Justice Secretary Agnes Devanadera nagkanayon nga ilang gitun-an karon ang posibilidad nga kasong terorismo ang ilang ipasaka human si administration Senator Miriam Defensor Santiago misaway nganong multiple murder ra ang gipasaka nga duna siya’y nakitang igong basehan aron mapasaka ang kasong terorismo nga mas dako og silot.

Gisusi na usab sa DOJ ang report nga ang ubang baling gigamit sa masaker iya sa Armed Forces of the Philippines, sa nahaunang report giingong gikan usab kini sa PNP Provincial Headquarters sa Maguindanao.

Samtang gibutang na sa immigration watch list ang ubang miyembro sa mga Ampatuan nga gipanghinganlan sa mga testigos nga may kalambigitan sa masaker nga naglakip ni Ampatuan Jr.; Maguindanao governor Datu Andal U. Ampatuan; Autonomous Region in Muslim Mindanao governor Zaldy U. Ampatuan; Nords Ampatuan; Akmad Ampatuan Sr.; Akmad Ampatuan Jr.; Saudi Ampatuan Jr.; Bahnarian Ampatuan; ug Sajid Islam Ampatuan. Matud pa ni Bureau of Immigration commissioner Marcelino Libanan kini gitumong aron malikayan unya nga di malangay sa imbestigasyon.

Ang mga nagkadaiyang news organizations sa Estados Unidos milusad og fund drive alang sa mga nabiyaang mga kabanay sa mga namatay nga mediamen sa maong masaker.

Kini mao ang Los Angeles-based Media Breakfast Club (MBC) nga molusad sa “Support for the Orphans of Slain Journalists" (SOS-J) drive.

Gikundenar sa nagkadaiyang media groups sa US ang linuog nga krimen batok sa mga Pilipinong tigbalita, naglakip kanila ang Asian American Journalists Association (AAJA) nga maoy labing dakong press organizations sa US.

Apan bisan paman sa nahitabo sa mga tigbalita di irekomendar sa Commission on Human Rights nga armasan ang mga mediamen sa mga lugar nga election hotspots.

 Si CHR Chairwoman Leila de Lima miproponer hinuon nga kinahanglan dunay sistemang sundon alang sa koordinasyon sa mga media outfits ug networks ilabi na kun mokober sa mga samok nga lugar, mahimo sad nga mangayo og security escort sa awtoridad ang mga mediamen. – BANAT NEWS