Manag-inahan sikop sa buybust operation

CEBU, Philippines - Inahan ug anak nakuhaan og 19 ka paketeng may sulod nga gidudahang shabu human madakpi sa buy bust operation sa kapulisan sa lungsod sa Argao niadtong Biyernes sa gabii sa barangay Tulic sa nahisgutang lugar.

Ang nadakpan giilang sila si Letecia Fernandez Alamario, 60, taga barangay Ermita dakbayan sa Sugbu ug anak niining si Jennifer Fernandez Almario, 36.

Una niini ang kapulisan sa lungsod sa Argao ang nakadawat og tawag sa usa ka concerned citizen labot na sa pagpamaligya og ilegal nga drugas sa usa ka “Nanay” sulod sa panimalay sa usa ka “Tito.”

Hinungdan nga sila si Chief Insp. Teodulfo Manatad III, hepe sa Argao Police Station daling mipahigayon og buy bust operation ug si SPO1 Arnold Abenir maoy nagsilbing poseur buyer.

Si SPO1 Abenir mipalit og bali’g usa ka libo ka pesos nga shabu ngadto kang Jennifer ug gitunol niini ang upat ka mga paketeng may sulod nga gidudahang shabu hinungdan nga kini gidakop, samtang sa pagrekisa sa kapulisan nakuhaan pa kini’g laing 12 ka pakete sa maong illegal nga drugas.

Ang inahan niining si Letecia misuway unta og ikyas apan nakuptan ni Manatad ug dihang girekisa nakuhaan usab kini og tulo ka paketeng shabu nga gikumkom sa tuong kamot.

Si SPO1 Abenir nagkanayon nga maghaturan lang og mga ilegal nga drugas gikan dinhi sa dakbayan sa Sugbu diha sa Argao ang duha. Gikatahong sa unang pagpangutana wala pa motug-an ang duha sa ilang tinuod nga pangalan apan dihang nakit-an ang ID niini sa senior citizen miangkon na si Letecia ug ang anak niini. (Guam Logrono)    (BANATNEWS)