Abinales sa Consolacion mi-file na og COC

CEBU, Philippines - Giduso na kagahapon ni Konsehal Isidro Arnulfo Abinales ang iyang Certificate of Candidacy (COC) alang sa pagka-mayor sa lungsod sa Consolacion sa 2010 election.

Si Konsehal Abinales maoy standard bearer sa Panaghiusa sa nahisgotang lungsod ug sakop usab sa Liberal Party .

Maoy tandem ni Abinales si Mayor Avelino Gungob kinsa motapos na sa iyang ikatulong termino sa pagka mayor sa maong lungsod.

Si Abinales nga nahinabi sa Banat News miingon nga kompleto na ang iyang line- up alang sa pagka- konsehal ug kini gilangkoban sa mga incumbent nga konsehal ug pipila ka mga barangay kapitan ug uban pa.

 Ang nakaduso na sa ilang COC mao sila si Mayor Gungob isip bise mayor, Arturo Quimod, Ike Maglasang, Anali Gungob, Illuminido Alin, Rey Balaba, Bonie Tibon, Gerald Jake Rodriguez ug Alfred Francis Alfie Ouano.

Si Abinales miingon nga si Gobernador Gwendolyn Garcia nga maoy ilang suportahan sa pagka-gobernador ug magpili pa usab sila sa uban pang kandidato sa pagka senador, pagka board member ug pagka kongresista sa ikaunom nga distrito sa lalawigan sa Sugbo. (Romeo T. Limpangog) (BANATNEWS)