Naalaang sakop sa gang tungod sa gisuot gipamusil

CEBU, Philippines - Manag-agaw nga pag-umangkon og polis gipusil sa gituohang miyembro sa gang nga nagmotor ug usa sa mga biktima namatay kagahapon sa kaadlawon sa dalan Katipunan diha sa sitio Bon-Ami barangay Labangon.

Ang namatay giilang si John Gilbert Alonso, 16, nga nakaangkon og samad sa iyang ulo ug wala na makaabot nga buhi sa tambalanan samtang ang 17-anyos niining ig-agaw (ngalan gipugngan) nakaangkon usab og samad sa tiyan ug kasamtangang giatiman sa tambalanan.

Sa pasiunang imbestigasyon sa kapolisan nasayran nga ang duha nagduwa og hantak daplin sa karsada sa nahisgutang dapit dihang kalit nga miabot ang duha ka wala mailhing batan-ong sakay og blue nga motorsiklo ug sa pagtungod kanila kalit silang gipaulanan og bala sa nag-angkas. Ang biktima nga nangasamdan daling gidala sa mirespondeng mga polis sa Cebu City Medical Center apan si Alonso gideklarar nga dead on arrival. Sumala pa sa igsuon sa biktimang naangol nga si Loyd nga nahinabi sa Banat News kagahapon nga di miyembro sa bisan unsang gang ang mga biktima apan giangkon niyang ang sinuotan nila susama gyud anang sa style sa mga miyembro sa gangs.

Sa pakighinabi sa Banat News kang PO2 John Robert de Castro sa Punta Princesa Police Station nga ig-agaw sa mga biktima nagkanayon nga ang maong motor makatulo na mabantaying nagbahis-bahis sa maong lugar sa wala pa ang hitabo. (Lesley Caminade)      (BANATNEWS)