'Drug pusher', crusaders mi-file COC

CEBU, Philippines - Samtang nagpaabot pa ang dakbayan sa mga dagkong pangalan sa mga kandidatong managan unya sa local 2010 elections, tulo ka mga managlahing indibidwal nga may mga kaugalingong papel sa katilingban ang misang-at og tagsa-tagsa nila ka mga sertipiko de kandidatura kagahapon dinhi sa dakbayan.

Ang retiradong opisyal sa kapolisan nga gibansagan kaniadtong “Mr. Nobody” tungod kay walay ilhon, basta sad-an sa balaod nga si retired Sr. Supt. Rico Palcuto misang-at sa iyang certificate of candidacy kagahapon sa hapon diha sa Comelec North District alang sa pagka-bise mayor sa dakbayan isip usa ka independente.

Si Palcuto, kanhi pangulo kaniadto sa Presidential Anti Organized Crime Task Force sa Camp Crame isip Chief Legal Investigator, kanhi sakop sa Philippine Constabulary –Integrated National Police ug sinaligan kaniadto ni kanhi Presidente Fidel Ramos.

Sa pagkakaron si Palcuto maoy usa sa mga consultant sa Philippine Amusement and Gaming Corporations.

Matud pang Palcuto sa pakighinabi sa Banat News nga wala siya'y gisaligang partido apan dako ang iyang pagsalig nga suportahan siya sa iyang mga kanhi kauban sa organisasyon.

Si Palcuto maoy nangulo kaniadto sa Social Intelligence Organization kansang mga sakop miyembro usab sa nagkadaiyang paksyon sa Guardians ug sa Association of National Alliance for Democracy (ANAD) Partylist.

Matud pang Palcuto nga dawaton niya ang si bisan kinsang gustong makigkuyog sa iyang grupo basta kadtong mga tawong may integridad, matinud-anon ug labaw sa tanan ‘may prinsipyo sa buhay.’

Tuyo ni Palcuto nga mapalig-on ug mapalambo ang seguridad sa dakbayan tungod kay dako kini og papel sa kalamboan sa negosyo kun dunay maagning mga investors dinhi.

Samtang laing mi-file og COC mao ang negosyanteng si James Philip Tionko, 46, isip usa gihapon ka independente ug pagka-konsehal ang buot niining daganan sa 2010.

Si Tionko, kanhi provincial chairman sa Drug Watch, usa ka grupong nangampanya kontra illegal drugs sugod niadtong 1998 hangtud 2001. Siya usab karon ang executive director sa Krusada Batok Drugas. Kagahapon, nakurat usab ang buhatan sa Comelec human usa ka gisuspetsahan sa kapolisan nga nalambigit sa illegal drugs ang misang-at sad og iyang COC nga si Crisistomo Mabitad Llaguno nga mas nailang ‘Tata Negro.’

Si Llaguno nga taga dalan B. Rodriguez sa barangay Sambag 2 wala personal nga mi-file sa iyang COC kundili gidala kini sa usa ka Kevin Villamor ug girepresentahan sa iyang abogadong si Danilo Yap.

Si Llaguno buot magpapili isip konsehal sa north district sa siyudad ug walay partidong gidala ug nagpaila kining usa ka negosyante, wala hinuon giasoy kun unsang negosyo ang iyang gipasabot.

Apan kaniadto, dihang nakontrobersyal ang insidente may kalambigitan ang mga sakop sa Cebu City Police Office ug si Llaguno kini mipasangil sa kapolisan nga mikuha sa usa ka sakong sensilyo gikan sa iyang panimalay.

Si Llaguno naila na sa iyang mga silingan nga nagnegosyo og video games nga hulugan og tagpiso, apan kaniadto gisuspetsahan kini sa kapolisan ug Philippine Drug Enforcement Agency (PDEA) nga usa ka big time drug pusher, butang nga gihimakak niini sukad pa kaniadto.

Si City Election Officer Marchel Sarno nasurpresa sa gihimo ni ‘Tata Negro’ nga kini wala mangunay sa pagduso sa iyang COC.

“Na-surprise lang ko kay ang ni-file lain man gong tawo dili man ang kandidato mismo pero gidawat gihapon ang iyang COC,” sumala ni Sarno.

Ang higala ug basketball buddy ni Tata Negro nga si Bise Mayor Michael Rama nipadayag nga dili mahimong pugngan ang kandidatura ni Llaguno.

“Bisag kinsa pa nga naay kasing-kasing nga muapil sa bugnong lugaynon ayaw gyud na ug pugngi kay constitutionally protected na,” matud ni Rama.

Ang pagpapili ni Llaguno nakasurpresa ni Mayor Tomas Osmeña.

“Dili man maayo ang iyang reputasyon, pero sige na lang dili man sab gihapon na siya makadaug nakasiguro gyud ko,” nagkanayon si Osmeña. – BANAT NEWS