Sonny O. magmayor

CEBU, Philippines - Pormal nang niduso sa iyang Certificate of Candidacy (COC) si kanhi senador John Henry “Sonny” Osmeña ngadto sa buhatan sa Comelec sa siyudad sa Sugbu kagahapong adlawa aron magpapili pagkamayor sa dakbayan sa sunod tuig isip independente.

Mipahibalo hinuon kining duna siya’y kaugalingong lineup sa mga konsehal nga naglakip ni retiradong heneral ug manlalaban Fritz Quiñanola, magpapatigayon nga si Jimboy Tionko ingon man gikan sa Bando Osmeña Pundok Kauswagan (BOPK).

Kini sama nilang Margot Osmeña, ug mga konsehal nga sila si Joey Daluz, Eduardo Rama, ug konsehal Richard Osmeña sa south district, konsehal Edgardo Labella ug konsihal Leah Japson sa north district. Ang mahabiling luna sa pagka-konsehal igahin sa kanhi senador sa mga kandidato usab sa Kugi Uswag Sugbu (Kusug) nga usa na niini mao si Cogon-Pardo barangay captain Eugenio “Jun” Gabuya nga iyang kuhaong runningmate o sa pagkakonsehal ba hinuon.

Gipadayag sa kanhi senador nga iyang gitinuod ang iyang pagduso og COC aron sa pagpamatuod ngadto kang GSIS president Winston Garcia nga siya seryoso sa iyang tinguha human ang naulahi mihulagway nga kinomedya ang iyang (Sonny) plano. Una nang gikataho nga si Garcia magpapili usab pagkamayor sa dakbayan sa 2010 elections ubos sa partidong Kusug.  - Elly Bolonos (BANAT NEWS)