CEBU, Philippines - Usa ka bangka de motor nga dunay sakay nga mga turista nalunod sa kadagatan sa isla sa Limasawa So. Leyte samtang nag-island hopping niadtong Martes sa alas 8 sa buntag tungod sa dagkong bawod dala sa bagyong Urduja nga miigo sa Kabisay-an. Gibutyag ni Lt. Michell Ursabia, public information officer sa Coastguard Central and Eastern Visayas District sa dihang nahinabi sa Banat News nga gikan sa Guindulman, Bohol ang sakayan nga “Lady Coco” nga dunay sakay nga lima ka mga German national, usa ka Swiss national ug unom ka tripulante.
Ang naluwas nga mga turista mao ang Swiss nga si Thomas Burgi, mga kauban nga sila si Gabi Girr, Marcus Coirman, Patrick Fihrenz ug Corinne Fihrenza nga pulos German. Ang unom ka tripulante mao ang boat captain nga si Reynaldo Rosales, mga crew nga sila si Gabriel Nialan, Emmanuel Olivar, Jasper Olivar, Daniel Logronio ug Dennis Olivar.
Matud ni Lt. Ursabia mipugos og biyahe ang sakayan gikan sa Bohol nga gipanag-iya sa usa ka operator og beach resort aron mag-island hopping ang mga guest. Apan pag-abot duol sa Limasawa, nakasugat og dagkong bawod ang sakayan hinungdan na nabali ang katig niini ug nalunod. – BANAT NEWS