CEBU, Philippines - Usa ka drug pusher dinhi sa Sugbu nga nadakpan sa buy bust operation sa Philippine Drug Enforcement Agency kun PDEA, gikonbikto sa korte sa kasong pagyuhot ug paghupot sa illegal nga drugas.
Si RTC-7 Executive Judge Mienrado Paredes mikonbikto kang Carlito Caballes, 45, lumad nga taga Labangon ning siyudad sa Sugbu ug gitumbok usa sa notadong tigpayuhotan sa ginadiling drugas dinhi sa siyudad.
Si Judge Paredes mihatag og gibug-aton ngadto sa mga ebidensiya ug testimonya sa prosecution nga ligitimate ang maong buy bust operation diin napamatud-an nga namaligya gyud ang maong akusado og shabu.
Wala tuhoi sa huwes ang pangatarungan sa akusado nga gi-planteran lamang siya og shabu hinungdan nga siya gipasakaan og kaso.
Nasayran nga si Caballes mitunol og usa ka pakite nga shabu sa pusher buyer nga miyembro sa PDEA dihang gipahigayon ang buy bust operation samtang nakuhaan usab kini og laing mga pakite sa shabu sa bulsa niini nga mitimbang og .04 gramos. Si Judge Paredes mipahamtang og silot ngadto kang Caballes nga mabilanggo sa tibuok kinabuhi tungod sa salaod nga nahimo niini. - Chester Abadilla (BANAT NEWS)