Hanging bridge talihagsa na

CEBU, Philippines - Ang kapitan sa barangay Lagtang nabalaka nga mahagsa ang hanging bridge diha sa ilang lugar nga nagsumpay sa barangay Lawaan III kung dili kini hatagan og pagtagad sa siyudad tungod kay gikaon na sa taya ang tukod niining kabilya.

Si Kapitan Celiapo “Cemi” Cabuenas sa barangay Lagtang sa pakighinabi niini sa Banat News kagahapon nagkanayon nga ang nahisgutang hanging bridge nagsumpay gikan sa iyang barangay paingon ngadto sa Lawaan III hinungdan nga migama na sila og joint resolution ni Kapitan Deliah Ybanez sa barangay Lawaan III kabahin sa ilang hangyo nga ayohon ang maong tulay ug giduso nila kini niadtong buwan sa Oktobre niining tuiga ngadto sa buhatan ni city engineer Audie Bacasmas.

Ang maong hanging bridge nga nagtabok sa sapa sa Mananga temporaryong gipasiradohan ni Cabuenas tungod sa iyang kabalaka nga mahagsa unya kini ug dunay madisrasya apan kagahapon ang mga residente diha sa iyang lugar mitang-tang sa mga gipang-ali nga mga plywood ug hollow blocks ug miagi diha sa tulay. Matud ni Cabuenas nga ang mga tawo dili makaagi diha sa ubos nga bahin tungod kay midako ang tubig sa sapa ug kuyaw nga pang-anuron na hinuon sila.

Sa maong sitwasyon dali siyang mitaho ngadto kang Mayor Socrates Fernandez kabahin niini ug matud ni Cabuenas nga ang mayor mimando kaniya nga pabantayan una ang tulay aron dili maagian paglikay sa disgrasya kay iyaha kining padalhan og taga engineering office aron maayo.

Ang maong tulay usa ka national project ug natukod kini niadtong tuig 2004 ug niadtong tuig 2006 giayo kini tungod kay ang mga sawog nga puthaw gipangkawat ug kuyaw kaayo niadto nga mabulasot ang mga moagi.   - Brenda D. Batuto (BANAT NEWS)