Pusher og shabu nasikop

CEBU, Philippines - Nadakpan sa kapolisan ang gikatahapang pusher og shabu sa sitio Ilog, barangay Opao, dakbayan sa Mandaue sa miaging gabii.

Ang nadakpan mao si Elmer Binarao, 28 , ulitawo nga walay trabaho, nga taga Opao kinsa nasakmitan og usa ka paketeng shabu , uban sa mga kahimanan sa pagpaaso niini atol sa usa ka buy bust operation sa mga otoridad.

Si Senior Inspector Alfredo Ortiz, hepe sa kapolisan sa Presinto 5 sa Opao Police Station maoy nangulo sa nahisgutang buy bust operation.

 Si SPO3 Danilo Barrita nga nahinabi sa Banat News miingon nga milungtad og pipila ka adlaw ang ilang pagpaniid sa mga illegal nga kalihokan sa maong dinakpan.

Dugang pa ni SPO3 Barrita nga ang maong dinakpan kinsa temporaryong gibalhog sa ilang selda sa detention cell sa Presinto 5 , gikatakdang pasakaaan nila og kaso bahin sa paglapas sa section 5, Article 3 sa Republic Act 9165 kun Comprehensive Dangerous Drug Act of 2002.   - Romeo T. Limpangog ug Bong Soriano (BANAT NEWS)