CEBU, Philippines - Gipasaka na sa Police Regional Office (PRO-7) ang kasong double murder batok sa duha ka Korean National ingon man sa tulo ka mga Filipino nga maoy mi-salvage sa duha ka Koreano kansang mga patay’ng lawas didto ilabay sa barangay Uling, dakbayan sa Naga niadtong Nobiyembre 15.
Gibutyag ni Chief Supt. Lani-O Nerez, hepe sa PRO-7 nga ang ilang gipasakaan og kaso mao ang utok sa maong krimen nga si Park Tai Sung, ang kauban niini sa negosyo nga usa usab ka Koreano ug ang laing tulo ka mga Pinoy.
Si Nerez nagkanayon nga ang mga testimoniya sa mga testigos nga ilang gihuptan nagbutyag nga ang tulo ka Pinoy miapil gyud sa maong krimen samtang ang lider sa sindikato nga si Park giingong maoy mipusil sa mga biktima nga sila si Choi Ho Sun, 41, ug Yang Soon Suk, 40, sa wala pa kini ilabay didto sa Naga.
Sa pagkakaron gipa-abot nalang nga malutsan og warrant of arrest ang tulo ka mga Pinoy ug si Park kinsa naka-uli na sa ilang nasud. - Guam Logroño (BANAT NEWS)