Ambulansiya sa Asturias natuwad

CEBU, Philippines - Tungod sa kadangog sa dalan dala sa pag-ulan-ulan tungod sa bagyong Urduja, usa ka ambulansiya sa lungsod sa Asturias aksidenting nalimbuwad ug midasmag sa konkretong koral sa sitio Cayam, barangay Colon, Naga kagahapon sa alas 8 sa buntag.

Ang ambulansiya nga adunay tatak nga Municipality of Asturias gimaneho sa usa ka Roel Lonard Dayon-Dayon, taga barangay Bolinawan, lungsod sa Balamban. Ang ambulansiya nakaangkon og grabeng kadaot, samtang ang drayber nakaangkon lamang og ginagmay’ng pangos ug bun-og sa lawas.

Matud pa ni PO2 Miguel Castañares sa Naga Police sa dihang nahinabi sa Banat News nga ang ambulansiya gikan sa dakbayan sa Sugbo ug paingon na untang mopauli sa Asturias.

Apan pag-abot sa maong lugar tungod usab sa kadangog sa dalan epekto sa walay hunong nga ulan-ulan, nadakin-as kini ug miresulta sa pagkalimbuwad human midasmag sa gate sa usa ka konkretong koral sa yuta daplin sa karsada nga gipanag-iya sa usa ka Carlito Aligante.

Walay laing sakay ang maong ambulansiya.

Apan kagahapon sa udto, gibutyag ni PO2 Castañares nga nakadawat sila og tawag sa telepono nga gihimulbolan ang ambulansiya hinungdan nga gipadad-an nila kini og mga polis nga mobadlong sa mga estambay nga nagsige og panguha sa mga nangaguba nga bahin sa sakyanan. (BANATNEWS)