CEBU, Philippines - Human sa basketball terrorism, gipasanginlan na usab karon sa oposisyon sa siyudad sa Sugbo ang kagamhanan sa dakbayan og health terrorism tungod sa pag-pull out niini sa mga barangay health workers sa Lahug nga naglakip sa mga doktor, nurses, midwife, ug uban pa.
Matud ni Kapitan Mary Ann delos Santos sa barangay Lahug nga dili makatarunganon ang gihimo sa kagamhanan sa dakbayan ngadto sa mga molupyo sa ilang barangay.
Gawas niini, miingon ang kapitan nga wala usab siya padalhi og suwat-pahibalo hangtod nga nananghid kaniya kagahapon ang mga health workers sa ilang pagbiya.
Gitataw hinuon sa labaw sa City Health Department nga si Dr. Fe Cabugao nga magpabilin gihapon ang ilang serbisyo diha sa Lahug.
Gipasabot ni Cabugao nga gibalhin lang ang iyang mga sakop ngadto sa TESDA compound duol sa Waterfront Hotel tungod usab sa mga reklamo niini.
Ang mga reklamo giingong naglakip sa kakuwang og tubig sa health center gawas nga magbanaw panahon sa ting-uwan ang ilang pasilidad.
Apan gipaneguro ni Cabugao nga magbilin sila og skeletal force sa health center, gawas sa plano nilang pagbutang og medical van sa Lahug.
Sa iyang bahin, giangkon ni Mayor Tomas Osmeña nga siya maoy nagpahiluna sa mga health workers diha sa TESDA tungod kay plano sa mayor nga motukod og expanded health center diha sa maong lugar nga moserbisyo sa kasikbit nga mga barangay sa Lahug.
Apan nagtuo si delos Santos nga politika ang hinungdan sa kalit nga pag-pull out sa siyudad sa mga health workers.
Alang sa kapitan, gilisod-lisod sa kagamhanan ang mga molupyo nga gustong mopahimulos sa serbisyo niini.
Dili hinuon makalimtan ni Osmeña ang leaflets nga gipang-apod sa mga molupyo sa barangay Lahug sa nakalabay nga eleksyon nga giingong iya ni delos Santos.
Lab-as pa sa huna-huna sa mayor ang nasuwat sa leaflets nga walay gihatag nga kaayuhan ang kagamhanan sa dakbayan diha sa maong barangay nga miresulta sa pagpakanselar ni Osmeña sa school building construction ug karon mao na usab ang pagpabalhin sa mga health workers. (BANATNEWS)