CEBU, Philippines - Samaran sa dughan ang usa ka drayber sa traysikol dihang imbis kuwarta maoy iplete, bala na hinuon ang gipataroy kaniya sa iyang pasahero didto sa Zone Sunlotan, barangay Calawisan, dakbayan sa Lapulapu sa miaging gabii.
Si SPO1 Frederict Islet sa homicide section sa kapolisan sa maong dakbayan nga nahinabi sa Banat News miingon nga ang upat ka mga pasahero didto mopara sa traysikol sa biktima sa barangay Poblacion apan sa paghiabot nila sa Sunlotan gimanduan siya sa usa sa upat niya ka pasahero sa pagpahunong sa iyang traysikol.
Si Islet miingon nga ang usa sa upat nga mga lalaki milipot sa luyo sa traysikol ug sa paglingi sa biktima kay nagtuo siyang plitehan siya’g kuwarta, bala na hinuon ang misugat kaniya nga mitaroy sa iyang dughan.
Dihadiha namiya dayon sa maong lugar ang maong mga pasahero ug gipasagdan ang biktima sa pagpadagan sa traysikol niini paingon ngadto sa Lapulapu District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo. Sa pagkakaron gipangita na sa kapolisan ang mga kriminal. (BANATNEWS)