CEBU, Philippines - Pormal nang misang-at sa ilang kandidatura ang pundok oposisyon gikan sa pagkamayor, bise mayor ug pagkakonsehal sa lungsod sa Compostela nga maoy mo-atbang sa grupo ni incumbent Mayor Ritchie Wagas.
Ang standard bearer sa Barug Alang sa Kauswagan kon BARUG party ni kongresista Red Durano sa kinto distrito nga si Bise Mayor Joel Quinio ug runningmate nga si Mary-Antonette Danggoy uban sa lineup sa mga konsehal nagdungan pagduso sa ilang certificate of candidacies sa buhatan sa Comelec alas 10:00 pasado kagahapon sa buntag.
Ang lineup pagka-konsehal sagad mga incumbent councilors sa lungsod nga mao sila si Konsehal Tessa Cang, Wilfredo Calo, Joy-an Cabatingan, Josephine Abing, Homer Canen, Josse Cagang, Francisco Oliverio ug Jonathan Alquisalas.
Samtang ang kampo ni Mayor Ritchie Wagas gitakda sab nga moduso sa ilang COC sulod niining semanaha. Si Kongresista Durano uban ang gatusan ka mga opisyal sa barangay ug mga supporters nagpanon nga misaksi sa pagduso sa COC sa kampo nila ni Quinio.
Mipadayag si Durano nga bukas niyang gisuportahan ang kandidatura ni Quinio ug kinatibuk-ang lineup tungod sa gitinguhang kausaban sa mga molupyo batok sa kasamtangang administrasyon sa lungsod.
Giangkon ni Durano nga nakadawat siya og daghang reklamo gikan sa mga molupyo sa Compostela kabahin sa mga kahiwian sa kasamtangang administrasyon sa lungsod apan wala na modetalye kun unsa nga transaksiyon.
Gipanghimakak usab ni Durano ang pasangil nga siya maoy nangusog pagbanhaw sa kasong malversation of public funds batok ni kanhi Mayor Gilbert Wagas nga igsuon sa mayor nga atua na sa Muntinlupa human gidakop sa National Bureau of Investigation sa duha ka semana na ang nakalabay human mahimong final and executory ang desisyon sa korte. (Darrel Carumba) (BANATNEWS)