Tapulan sa BOPK i-junk ni Osmeña

CEBU, Philippines - Gibaharan ni Mayor Tomas Osmeña ang tapulan niyang mga konsehal nga i-junk sa Bando Osmeña Pundok Kauswagan (BOPK) kung kanunay mopalta sa regular nilang pulong-pulong sa nagkadaiyang sitio sa kabarangayan sa dakbayan.

Na-obserbahan sa mayor nga nagsalig na ang uban sa iyang mga konsehal nga sila walay klarong kontra hinungdan nga dili na manguyog sa pulong-pulong. Kasagaran sa giingong sagad mupalta sa nahisgutang kalihukan mao ang mga konsehal sa amihanang distrito sa siyudad.

“They’re getting lazy, sa pulong-pulong absent-absent sila…actually, if they are not careful, I will just junk them,” nagkanayon ang mayor ug mipasabot nga bisan walay klaro ang kaatbang di gyud kini rason aron magkumpiyansa.

Nasayran hinuon nga tulo na lang ka mga konsehal sa north district ang magpasubli sa umaabot nga eleksyon nga mao sila si Konsehal Edgardo Labella, Augustus Pe Jr., ug Leah Japson, tungod kay ang uban anaa na sa ilang ikatulo ug katapusang termino.

Bugtong gidayeg ni Osmeña nga kanunay'ng motambong sa ilang mga pulong-pulong mao ang anak ni Kongresista Antonio Cuenco nga si Ronald, ang naulahi gikatahong tua na karon sa kaulohan tungod kay iuli na niini ang iyang pagka-green card holder kay magpapili kini pagka-konsehal sa siyudad.

Gikatahong tulo ngadto sa unom ka pulong-pulong ang gibuhat sa BOPK sa kabarangayan. (BANATNEWS)