CEBU, Philippines - Giklaro ni Msgr. Esteban Binghay, Episcopal Vicar sa Artsedysisis sa Sugbu nga dili pa matawag nga nangampanya ang usa ka pari nga maghisgot og pangalan sa tawong iyang gipaboran basta wala pa kini makalukat og certificate of candidacy.
Kini maoy reaksyon ni Binghay kabahin sa reklamo sa mga parokyano sa usa sa mga lungsod sa habagatang bahin sa lalawigan sa Sugbu nga mipasangil nga pagpunay og duso og kandidato ug manaot sa kaatbang nga kandidato ang maong pari atol sa Santos nga Misa.
Si Binghay nga nahinabi sa Banat News nagkanayon nga dunay kamandoansi Archbishop Ricardo Cardinal Vidal sa tanang kaparian sa Simbahang Katoliko nga dili gyud gamiton ang pulpito atol sa misa alang sa pamolitika.
Giklaro sa Cardinal nga walay gidapigan ang Simbahan kay usa kini ka non-partisan ug dili gyud angayang mohisgot og pangalan sa usa ka kandidato ilabina karung nagkaduol na ang piniliay sa sunod tuig.
Kini aron paglikay nga dili kadudahan ang pari nga dunay gidapigan ug gipaboran nga maoy pabotohan sa mga parokyano sa adlaw sa piniliay.
“Seguro sa pagkakaron personalities pa lang na kay wala pama'y official nga modagan kay wala paman mosang-at sa Certificate of Candidacy (COC) pero very impartial gyud ang simbahan nga walay gidapigan aron paglikay nga partisan ang simbahan,” matud pang Binghay.
Giklaro usab niyang dili kura paroko sa maong lungsod ang nahisgutang pari kundili miyembro ra sa kaparian sa maong lugar.
Matud niya nga dunay grupo sa mga lay people nga gipangulohan ni Father Carmelo Diola sa Dilaab Foundation nga maoy gitahasang molibot sa Pilipinas nga mopahibawo sa usa ka kandidatung maoy angayang pabotaran karung umaabot eleksyon sunod tuig.
Ang maong pari gisuwayan unta sa pagkontak aron kakuhaan sa iyang habig apan napakyas kining tigbalita kagahapon. (BANATNEWS)