Kapitolyo miapil pagkwestiyon sa 'extravagant lifestyle' ni Tomas

CEBU, Philippines - Gawas sa lider sa oposisyon sa siyudad sa Sugbo Jonathan Guardo, ang Kapitolyo mihirit usab sa pagsaway sa gihulagway nga extravagant nga gastos ni Mayor Tomas Osmeña ilabi na sa pag-adto sa gawas sa nasud ug sa pagpaeskwela sa ilang anak sa usa ka mahalon nga tunghaan didto sa Estados Unidos.

 Si Capitol Consultant on Information Rory Jon Sepulveda mikwestyon sa gastos ni Osmeña sa pag-adto sa nasud sa Columbia ug ubang nasud niining tuiga kini bisan paman sa pangangkon sa mayor nga ang gastos gisawo sa higala niini.

Kini tungod kay kalapasan gihapon base sa Anti-Graft and Corrupt Practices Act nga laing mga tawo ang mogasto sa usa ka lokal nga opisyal sa pag-adto sa laing lugar kay makautang og kabubut-on ang naasoy nga opisyal.

 Segun pa ni Sepulveda nga sa nanggawas nga report sa lokal nga pamantalaan nagdumili sa pagtug-an ang mayor sa mga ngalan sa suod nga higala nga maoy migasto sa paglulinghayaw niini sa nasud sa Columbia.

 Apan nakadawat siya og taho gikan sa sinaligang tinubdan nga ang maong suod nga higala mao ang tag-iya sa Filinvest Land Inc. nga nakapalit og 50 ka hektaryang lote sa South Road Properties (SRP) pinaagi sa usa ka Joint Venture Agreement.

 Si Sepulveda nagkanayon nga klaro kaayo kining kapalasan sa Anti-Graft and Corrupt Practices Act hinungdan nga nanawagan siya sa Ombudsman nga mohimo og pakisusi batok sa mayor sa siyudad sa Sugbo. - BANAT NEWS