Cordova isakop sa 'Cebu Province of Mactan': Sitoy

CEBU, Philippines - Dakong uyon si Mayor Adelino Sitoy sa Cordova nga mahimong tipik sa dakbayan sa Lapulapu ang lungsod sa Cordova ug mahiusa na ngadto sa usa ka probinsiya aron matukod ang “Cebu Province of Mactan.”

 Si Sitoy atol sa pakighinabi sa Banat News atol sa ilang pormal nga pagsang-at sa ilang Certificate of candidacy sa Comelec sa milabay'ng Sabado nagkanayon nga duha lamang ka dapit ang ilang angayan nga sanongon.

Kini ang magpasakop sa dakbayan sa Lapulapu ug ang nagpanikad usab nga tinguha ni Mayor Tomas Osmeña nga mamahimong kabahin sa dakbayan sa Sugbo ang lungsod sa Cordova.

 Apan kun siya ang masunod mas maayo nga sa dakbayan sa Lapulapu sila magpasakop ug ang mamahimong unang kongresista sa lone district sa dakbayan sa Lapulapu ug ang mamahimong bag-ong kongresista sa 6th District sa lalawigan sa Sugbo maoy iyang hangyuon nga mosang-at og balaodnon sa kongreso nga magtukod sa "Cebu Province of Mactan" diin ang Cordova ug Isla sa Olango maoy mga munisipyo niini ug magpabiling dakbayan ang Lapulapu.

 Gumikan niini, kun malampuson ang maong tinguha aduna nay kaugalingong gobernador ug bise gobernador ang Probinsiya sa Mactan ug mga board members niini.

 Apan kining tanan matuman lamang kun aduna nay pormal nga panagsabot-sabot tali kaniya ug sa bag-ong mga opisyales sa dakbayan sa Lapulapu human sa piniliay sunod tuig.

 Mapasalamaton usab si Sitoy nga si Lapulapu City Mayor Arturo Radaza adunay tinguha nga sagupon ang lungsod sa Cordova human nga nahimong highly urbanized city ug lone district ang dakbayan.  - Bong Soriano (BANAT NEWS)