Giluba sa piyesta sa Lapulapu

CEBU, Philippines - Samaran sa buko-buko ang usa ka Muslim human kini dunggaba samtang namiyesta   didto sa Purok Papaya Progress, Brgy. Gun-ob, dakbayan sa Lapulapu kagahapon sa kaadlawon.

 Ang biktima mao si Jamail Luna Diok, 29, ulitawo, lumad nga taga Cotabato City ug temporaryong nagpuyo sa Brgy. Ibo dakbayan sa Lapulapu, samtang ang mga suspetsado mao sila si Philip Roman Cabangon, 28, walay trabaho, Celso Albano, hingkod ug may lain pang duha nila ka kauban.

 Si SPO3 Rex Ibanez mibutyag sa Banat News nga niadto pang miaging adlaw naabot sa dakbayan sa Lapulapu ang biktima gikan sa Mindanao.

 Unya mikuyog kini sa iyang higala nga si Nilo dela Cerna aron mamiyesta didto sa Brgy. Gun-ob sa maong dakbayan.

 Apan samtang nag-inom sila sa usa ka tindahan, may upat ka mga silingan si dela Cerna nga nasuya sa biktima unya nagpasingit lang kini hangtod nga nakiglalis kini sa naulahi.

Dihang nahutdan na sa katarungan, gitabangan dayon sa upat og luba ang biktima hinungdan nga gitaopan sa kutsilyo ang buko-buko niini. (Romeo T. Limpangog ug Bong Soriano)   (BANATNEWS)