CEBU, Philippines - Usa ka kanhi manager sa estasyonan sa radyo sa gobyerno gidayeg sa mga magtutudlo ug mga estudyante sa lungsod sa Barili gumikan sa kinabubut-on niining pagpanghatag og mga libro ngadto sa mga eskuylahan sa maong lungsod.
Si Rene Alquizola, kinsa manager kanhi sa DYMR Radyo ng Bayan Cebu , maguwang ni anhing mayor Roberto”Bobby” Alquizola sa Barili nagkanayon nga ang iyang gihimo maoy iyang halad sa mga taga Barili isip usa ka lumad nga Barilinhon.
Gisukit kun ang iyang gihimo nga pangalagad sa iyang tagi-lungsod magpasabot ba nga may laraw siya alang sa nagsingabot na ang piniliay.
Si Alquizola nagkanayon nga wala siyay laraw niini, bisan ang tinuod gikan sa iyang amahan ug sa iyang mga igsuon ug sa iyang mga ig-agaw ug mga kaparyentihan, maoy kasagarang nanaghupot og mga katungdanan sa kagamhanan sa Barili .
Mitug-an si Alquizola nga daghan na kaayong nagdapit kaniya nga palansaron siya isip konsehal sa ilang lungsod, apan iya kining gibalibaran sa pagkakaron.
Ang nalantawan sa taga Barili nga si Alquizola tungod sa kalapad na sa kasinatian niini sa edukasyon, panarbaho, ug sa panerbisyo sa katawhan dako kaayo og ikatampo alang sa maayong pagdumala sa lungsod sa Barili.
Hinuon siya nagkanayon nga iya pang gihunahuna ang tanan ilabi na karong miretiro na siya sa pangalagad sa kagamhanan ug may pipila pa ka adlaw sa dili pa matapos ang sinang-atay sa sertipiko de kandidatora. (Wen Celen) (BANATNEWS)