Konsehal Belleza mosuporta sa iyang bana

CEBU, Philippines - Bisan og dili na maayo ang sitwasyon sa ilang kaminyoon apan si Konsehal Shirley Belleza kinsa last termer na nga konsehal sa dakbayan sa Talisay misuporta gihapon sa iyang bana nga si kanhi Bise Mayor Aberdovey Belleza kinsa nagplanong magpapili pag-usab sa mao gihapong katungdanan sa maong dakbayan karong umaabot nga eleksiyon sa tuig 2010.

Ang magtiayong Belleza gikatahong taud-taud na nga wala na mag-ipon kay nagkasumpaki tungod sa personal nga problema.

Apan bisan og nagkabuwag na sila karon, padayon gihapon ang ilang komunikasyon isip managhigala.

Giangkon ni Shirley nga usa siya sa nag-awhag sa iyang bana nga mosubli og dagan isip bise mayor sa siyudad.

Iyang gibutyag nga ang iyang bana dunay ambisyon nga modagan isip mayor sa Talisay sa eleksiyon sa sunod tuig apan iyaha kining giagni nga maghuwat pa sa hustong panahon.

Si Shirley mihimakak sa taho nga si acting vice mayor Alan Bucao mao nay running mate ni Mayor Socrates Fernandez.

Gibutyag ni Shirley nga sa milabay’ng semana ang konseho sa Talisay miduso na sa long list sa mga modagang kandidato sa Talisay ngadto kang Kongresista Eduardo Gullas ug ang final nga mohukom niini mao ang kongresista.

Si Shirley midugang nga usa siya sa mipirma sa long list ug nakita niya ang ngalan sa iyang bana sa listahan nga maoy mo tandem ni Mayor Fernandez sa umaabot nga eleksiyon.

Ang tanang mga konsehal sa siyudad miduso kang Aberdovey nga maoy mahimong running mate ni Fernandez.

Gikataho nga ang administrasyon miduso kang Bucao nga modagan isip provincial board. (Brenda D. Batuto)    (BANATNEWS)