Kapitan 'nanghinol' gidakop
CEBU, Philippines - Nagtingkagol na sa karsel sa kapulisan sa lungsod sa Barili ang usa ka 72- anyos nga barangay kagawad human madakpi tungod sa warrant of arrest gumikan sa pagbinastos ngadto sa usa ka minor de-edad.
Si San Rafael barangay kagawad Jose Vergara sa lungsod sa Barili gidakop sulod sa iyang balay pinasikad sa warrant of arrest sa kasong act of lasciviousness in-relation to R.A. 7610 nga gi-isyu ni Judge Leopoldo Cañete sa Regional Trial Court (RTC) branch 60 sa Barili.
Ang maong krimen nahitabo karong tuiga ug gumikan sa pag-reklamo sa mga ginikanan sa biktima nalutsan kini og warrant of arrest ug gi-rekomendar ni Judge Cañete nga makapiyansa og P80 mil alang sa iyang temporaryong kagawasan.
Si SPO2 Zaldy Urello, desk officer sa Barili Police Station nga gikahinabi sa tigbalita nagkanayon nga ang biktima giingong gihinul-hinol sa maong opisyal diha sa ilang tindahan.
Hinungdan nga nisumbong kini sa iyang mga ginikanan ug gipasakaan og kaso. (Guam Logroño) (BANATNEWS)
- Latest
- Trending
