CEBU, Philippines - Usa ka piniriso sa kapulisan sa lungsod sa Ronda ang nakahigayon sa pag-eskapo human gipagawas sa karsel ug gisugo paglabay og basura apan wala na mobalik niadtong Biyernes sa buntag.
Ang naka-eskapo mao ang pinirisong si Fernandez Sameo Blanco, 24, lumad nga nagpuyo sa barangay Langin sa lungsod sa Ronda nga nag-atubang og kasong pagpangawat.
Matud pa ni SPO1 Gerome Pardo sa Ronda Police Station dihang nahinabi sa Banat News nga ang jailer niadtong higayuna nga si PO1 Benedicto Rubia misugo sa tulo ka piniriso sa pagpanglimpyo sa mga nakatag nga basura sulod sa ilang selda.
Pagkahuman gipasulod sa sako ang mga basura gisugo niini si Blanco pagpalabay niini sa gawas nga bahin sa police station.
Apan nilabay nalang ang pipila ka mga gutlo wala gyud kini mahibalik hinungdan nga ila kining gisusi ug diha nalang nila masayring nakasibat na kini. Daling gipahigayon sa kapulisan ang manhunt operation apan wala na gyud nila kini makit-i og balik ang maong piniriso ug kagahapong adlawa nagpadayun pa ang pagpangita niini.
Matud pa ni SPO1 Pardo nga si Blanco niadto lang kining petsa 18 ning bulana nasulod sa detention cell tungod sa kasong pagpangawat.
Dugang nahipos nga impormasiyon nga si Blanco nakombikto na kaniadto sa susamang kaso apan nahatagan og probationary parole apan sukad niadto wala kini magbisitahan sa awtoridad nga maoy gitahas kaniya kay mitago kini ngadto sa Mindanao.
Niini lang bulana nakahukom nga mopauli sa lungsod ug mitahan sa kapolisan hinungdan nga nabalhog apan nieskapo na usab sa milabay’ng adlaw.
Nasayran nga ang gikawat sa suspek kaniadto mao ang traysikad sa iyaan. Gituohang gimingaw kini sa iyang kapuyo ug anak nga giingong nagtrabaho isip katabang sa lungsod sa Consolacion sanglit panagsa lang kining moduaw.
Samtang gikatakda unang hingpit nga mapasaylo sa iyang krimen ang suspek karong umaabot nga bulan sa Pebrero sa sunod tuig kun mituman kini sa tahas subay sa probation parole nga gihatag kaniya. (BANATNEWS)