'Go Cebu' gilusad ni Georgia

CEBU, Philippines - Kun dunay ‘My City’ si Mayor Tomas Osmeña ug partido ug ‘Our City’ ang opposition pinanguluhan nila ni Lahug barangay kapitan Mary Ann delos Santos ug Jonathan Guardo, milusad usab kagahapong adlawa ang grupo ni Georgia Osmeña sa “GO Cebu” movement.

Matud pa ni Georgia mao ni iyang himuong behikulo alang sa iyang tinguha pagpapili pagkamayor sa syudad sa Sugbu sa sunod tuig nga piniliay.

Ang launching gipahigayon atubangan sa estatuwa sa iyang amahan nga si Sergio “Serging” Osmeña Jr., diha sa North Reclamation Area. Matud pa niini nga kun wala pa ilang amahan wala siya niining panahona ug di siya makat-on paghigugma sa Sugbu. Lakip sa mitambong sa launching mao si Agsungot barangay captain Pastor “Jun” Alcover III, Pit-os barangay captain Nilo Tariman ug uban pa.

Sa iyang bahin, wala hatagi og gibug-aton sa mayor ang paglusad sa iyang igsoon sa Go Cebu movement apan wala kapugngi sa mayor nga mokomentaryo sa pagpahigayon niini sa estatuwa sa ilang amahan.   

“Mosakay lang siya bisan asa, gigamit niya ang akong sakit, gigamit niya ang akong amahan, ambot niya,” sumala pa sa mayor. – BANAT NEWS