Sundalo, sibilyan angol sa ambush

CEBU, Philippines - Usa ka sundalo ug sibilyan ang naangol human gibanhigan sa gidudahang mga sakop sa New Peoples Army kagahapon sa alas 8:05 sa buntag sa National Highway sa sitio Molobolo, barangay Tabon, Vallehermoso, Negros Oriental.

Ang tigpamaba sa Central Command (CENTCOM) Major Wilson Feria miila sa naangol mao si Pfc. Ariel Pangation ug ang 15-anyos nga sibilyan (ngan gipugngan sa Banat News) nga gidala sa Guihulngan Hospital.

Si Pangation naigo sa tuong abaga samtang sa walang abaga usab naigo ang bata gikan sa saag nga bala nga residente duol sa nahitaboan diin gibanhigan ang kasundaluhan diin kini magbuwad og humay.

Matud pang Feria pito ka mga sakop sa 11th Infantry Battalion gipanguluhan ni 1st Lt. Jimrhic Tobias sakay sa service vehicle migikan sa ilang kampo diha sa Guihulngan paingon unta sa Bacolod City.

Apan sa pag-abot sa sitio Molobolo kalit silang girakrakan sa gibana-banang napulo ka mga rebelde.

Sumala pa niini nga nakahigayon sa pakigsinukliay og bala ang tropa sa militar sulod sa singko minutos hinungdan misibog ang mga rebelde, gikatahong dunay mga lama sa dugo diha sa gipwestohan sa mga rebelde hinungdan nga nagtuo silang dunay nangaigo sa pikas habig.

Padayon pa ang hot pursuit operation sa mga sakop sa 11th IB sa mga responsable samtang gidala sa tambalanan ang duha ka samaron, giklaro ni Feria nga naamong ra ang maong bata sa sinukliay sa bala.

Gihulagway ni Feria nga desperado na ang mga NPA pagpahigayon og susamang operasyon aron ipakita sa publiko nga duna pa sila'y ikabuga apan sa pagkatinuod daghan na sa ilang kaubanan ang mitahan sa gobiyerno ug nangamatay. – BANAT NEWS