CEBU, Philippines - Atbangan og usa ka barangay kapitan sa lungsod sa Dumanjug si Kongresista Pablo “Pabling” Garcia diha sa Segundo Distrito kun kini mohinayon sa pagdagan pagkamayor sa maong lungsod sa 2010.
Usa ka tinubdan nga nagdumili lang pagpaila sa iyang kaugalingon ang mibutyag nga nikatap karon ang balitang molansar pagkamayor si kongresista Garcia sa Dumanjug ug ang iyang ikapares mao ang iyang anak nga si Nelson Garcia.
Kun kini mahinayon gikatahong ikaatbang unya ni Garcia ang anak ni Dumanjug Mayor Cesar Baricuatro nga si Ylaya barangay Kapitan Cris Dong Baricuatro.
Si kapitan Baricuatro mipadayag atol sa interview sa DyDD nga nakadungog usab sila sa maong di kumpirmadong impormasyon nga mokandidato ang manag-amahang Garcia sa ilang lungsod.
Gidugang sa maong tinubdan nga si Boljoon Mayor Deogenes Wargong Derama maoy gituboy ni Pabling nga mohulip niya pagkandidato pagka-kongresista sa segundo distrito ubos sa One Cebu Party sa iyang anak nga si Gov. Gwendolyn Garcia.
Matud pa ni kapitan Baricuatro nga wala sila mahulga niini tungod kay kompleto na ang ilang lineup. Si 1st councilor Contrano Gongon Gica maoy ilang napiling mahimong running mate uban sa incumbent councilors ug opisyal sa kabarangayan sa ilang lineup.
Sumala pa niini nga siya maoy nakahukom nga hulipan ang amahan tungod kay naa na kini sa ikatulo ug katapusang termino ug aron iyang matiwas ang mga nasugdang programa niini sama sa pagpa-semento sa mga kadanan sa kabarangayan, patubig project ug pagpasuga ilabina sa mga barangay sa bukirang bahin.
Samtang ang iyang amahan nga kasamtangang presidente sa Municipal Mayors League Cebu Province, nangandam na pagpapili pagka-kongresista sa segundo distrito ubos sa Nationalista Party ni Senador Manny Villar bisan paman og si kongresista Garcia ang iyang ikaatbang. – BANAT NEWS