Atan misumbalik, lifestyle ni Tomas angay ipasabot

CEBU, Philippines - Ang negosyante ug sportsman nga si Jonathan Guardo nagtuo nga mabasura ang kasong giatubang kalabot sa giingong kapakyas pag-account sa pundo alang sa South East Asian (SEA) games.

Matud ni Guardo nga malampuson ang pagpahigayon sa SEA games, ug gani si Mayor Tomas Osmeña ug si Konsehal Sylvan Jakosalem miangkon nga malampuson ang kalihukan.

“If the hosting was a huge success according to the mayor and his allies in their statements after the games, it goes to show that funds were spent wisely,” si Guardo nagkanayon sa iyang pamahayag.

Apan naguol si Guardo nga gigamit niya ang kaso aron gub-on ang iyang pagkatawo.

Misumbalik hinuon og awhag si Guardo ngadto kang Osmeña sa paghatag sa publiko og kuwentada sa iyang kampanya sa Bando Osmeña Pundok Kauswagan (BOPK) sulod sa 20 ka tuig ug ang gasto sa kanunay niyang paglarga sa Amerika pinaagi sa first class ticket sa Cathay Pacific nga nagkantidad og $3,000 matag biyahe ug ang bayad sa pagpa-ospital sa Houston nga nagkinahanglan og P10 milyones matag check-up.

“If you are earning P360,000 a year (P30,000 a month) and spend a million pesos alone for airfare to the States the past year, where do you get your money for food, salary for househelp, payment of your utility bills,” si Guardo nagkanayon.

Si Guardo miingon nga gikan sa iyang kaugalingon bulsa ang gigasto alang sa burial ug healthcare assistance program sa south district, lakip na ang mga basketball boards nga gipang-ibot sa kagamhanan sa dakbayan.

Si Osmeña sa iyang bahin nagdumili sa pagtubag sa awhag ni Guardo.

Nagkanayon kini nga matag human sa eleksiyon, misang-at sila og statements sa nagasto ang BOPK. “Let him file charges if he wants.” Giangkon hinuon ni Osmeña nga sa first class siya makalingkod sa Cathay Pacific, apan pagbuot kini sa airline kun adunay bakante.

Ang mayor mipasabot hinuon nga maka-ospital siya og ingon ka mahal sa Amerika tungod sa iyang $5 milyones nga insurance policy kang kansang premium gibayran ni Minnie Osmeña sulod sa 10 ka tuig.