CEBU, Philippines - Kritikal ang kahimtang sa usa ka 32 anyos nga lalaki human kini lubaa sa usa ka hubog didto sa Sitio Tabay’ng Lawom, barangay San Vicente, lungsod sa Liloan niadtong Martes sa alas 9 sa buntag.
Ang biktima mao si Diosdado Batad, 32 , ulitawo, nga taga Upper San Vicente, Liloan, samtang ang suspek mao si Oscar Pobadora Sollera, 34, ulitawo, nga taga Guinacot siyudad sa Danao apan nagtrabaho sa usa ka tindahan sa Liloan.
Si PO1 Armando Mahinay sa Liloan Police Station mibutyag sa Banat News nga ang suspek nag-inusarang nag-inom og bino sa usa ka tindahan nga gipanag-iya sa usa ka Jossy dihang aksidenteng naigo ang iyang walang mata sa payong nga gidala sa usa ka kustomer busa dali kining mipauli sa ilang balay.
Apan paglabay sa pipila ka gutlo nahibalik ang suspek ug nagdala na og kutsilyo ug pag-abot sa maong lugar maoy iyang nakita ang biktima didto sa tindahan.
Gumikan sa iyang kalagot nga napisok ang iyang mata, iya dayong gidunggab sa walang bahin sa dughan ang biktima.
Human sa pagpanunggab, misuway og sibat ang suspetsado apan naabtan siya sa mirespondeng kapolisan ug gibalhog dayon siya sa prisohan samtang ang biktima anaa karon sa Vicente Sotto Memorial Medical Center sa dakbayan sa Sugbo. - Darrel A. Carumba (BANAT NEWS)