CEBU, Philippines - Usa ka tawong hubog gipusil angol sa iyang silingan human niya hapaka og bato ang ulo sa amahan sa namusil kaniya didto sa sitio Quary, barangay Sabang, dakbayan sa Danao sa miaging gabii.
Ang gilapsan sa bala sa kalibre .45 mao si Michael Mahilom, 30, minyo, nga taga Sabang, samtang ang suspetsadong nakapusil kaniya mao ang usa ka ginganlan lang og Toto Donaire, nga iyang silingan. Matud ni SPO4 Teofilo Deguilmo sa Danao City Police Station nga sa wala pa luthanga ang biktima, giingong lasbag kaayo kini uban sa iyang mga amigo nga nangagda og inom sa suspetssado.
Apan tungod kay mibalibad ang suspek, nasuko kuno ang biktima nga misangpot sa mainiton nilang lalis.
Ang amahan sa suspek nga si Ladislao Donaire nga nakadungog sa maong lalis, miduol ug midapig sa suspek nga iyang anak.
Apan matud pa napungot ang biktima ngadto kang Ladislao ug mipunit kini og bato ug gihapak sa bagolbagol sa naulahi hinungdan sa pagkapahak sa ulo niini ug mibuhagay usab ang daghang dugo .
Sa dihang nakita ni Toto nga naligo na sa dugo ang iyang amahan, mikuha kini og .38 kalibre sa ilang balay ug gitirohan dayon si Mahilom.
Si Mahilom kinsa nasabak sa bala sa tuong bahin sa dughan ug milapos kini ngadto sa iyang bukobuko kalit lang nahilom. Pag-abot sa kapolisan gidungan og hatod ngadto sa tambalanan sa dakbayan sa Sugbo si Mahilom ug si Donaire, samtang si Toto misirit dayon ug mao kini gipangita karon sa kapolisan sa Danao. - Romeo T. Limpangog ug Darrel Carumba (BANAT NEWS)