Museum di angay unahon - Sepulveda

CEBU, Philippines - Si Capitol Consultant on Information Rory Jon Sepulveda mitumbok kagahapon nga dili na kinahanglanon nga motukod si Mayor Tomas Osmeña og P100 milyones nga balor sa usa ka museum alang sa Pambansang Kamao nga si Manny Pacman Pacquiao.

Matud pa ni Sepulveda mas angayang ibubo ni Osmeña ang maong salapi ngadto sa nag-unang atimanunon sa dakbayan.

"Walay problema ang paghimo sa mayor og museum ni Pacquiao bisan og buhi pa si Pacquiao kun kompleto pa lamang ang serbisyo nga gihatag niya ngadto sa mga katawhan sa siyudad," suma pa ni Sepulveda.

Matud ni Sepulveda nga dili haum sa pagkakaron ang maong proyekto sa mayor  kay sa iyang nahibaw-an sa mga nanggawas nga balita nga wala ihinayon sa mayor ang paggahin og P500 milyones alang sa improvement sa traffic lights sa siyudad, ingon man ang paggahin og kantidad sa pagpalimpyo sa mga esteros sa siyudad, lakip na ang pagpatunhay sa peace and order ug uban pa kay kuwang sa pundo ang kagamhanan alang niini.

Sigon pa ni Sepulveda nga ang proyekto nga angayang unahon sa mayor mao kadtong mga proyekto nga gitumong gayud sa pagtubag sa mga basic services nga gikinahanglan sa mga molupyo sa siyudad.

Gihimong sanglitanan ni Sepulveda ang kaanindot sa pagbutang og Christmas decoration atol sa kasaulogan sa Pasko apan kun walay ikapalit og bugas, mahimong mapasmo ang mga tawo kun unahon ang pagpalit sa mga dayandayan lamang.  -  BANAT NEWS