CEBU, Philippines - Gibutyag ni Senate President Juan Ponce Enrile nga wala nay panahon aron mapasar sa senado ang Right to Reply Bill tungod sa hamubo nga panahon pagtuki sa maong balaudnon.
Ang rason ni Enrile mianhi dinhi sa Sugbu kagahapon nagkanayon nga magsugod karung adlawa ang bakasyon sa Senador ug usa ka semana pa sila mobalik og sesyon.
Apan inig balik sa sesyon sa Senado ilang unahon og tuki ang budget sa 2010 ug human niini aduna na sab sila’y laing break nga mao ang Christmas break.
Matud ni Enrile nga mobalik ang ilang sesyon sa Senado karun pang bulan sa Pebrero sunod tuig aduna na sab sila’y hatagan og prayoridad nga tukion kini mao ang Omnibus election code.
Mipasabot siyang daghan kaayong gikinahanglang amendahon sa Omnibus election code sanglit lahi naman ang sistema sa eleksyon karong mogamit na og automated machines.
Apan si Enrile mipadayag nga dako gyud siyang supak sa ‘Right to Reply Bill’ bisan kun aduna pay igong panahon sanglit matud niya nga dili kinahanglan lisud-lisoron ang mga sakop sa media nga mahikawan na hinuon sa pagpagawas sa tinuod nga balita batok niadtong mga opisyal nga giakusahang nakahimo og anomaliya.
Matud niya nga ang usa ka opisyal nga nabalita ug namantala kun wala makauyon ug nasakitan sa gisulat sa usa ka tigbalita mahimo man silang modangop sa korte ug mopasaka og kasong libelo.
Alang kang Enrile dili makiangayon nga pugngan ang mga sakop sa media pagpagawas sa kamatuoran. - Rey Pasaporte (BANAT NEWS)