Comelec sa Talisay wa kadawat og reklamo

CEBU, Philippines - Ang Commission on Elections (Comelec) sa dakbayan sa Talisay walay nadawat nga mga reklamo o protesta bahin sa mga politiko nga mibalhin sa pagparehistro. Si Corazon Moran, hepe sa Comelec sa siyudad mibutyag nga adunay mga insidente nga ang politiko o nagplanong modagan sa piniliay sa usa ka siyudad mobalhin og pagparehistro ug dunay mga tawo nga moduso og protesta apan karon sa Talisay wala sila’y nasugatan og samang insidente.

Niadtong Lunes ang kataposang adlaw sa pagduso og protesta ug gipasabot ni Moran nga kung adunay mo protesta iduso kini ngadto sa Election Registration Board ug ang board na maoy mohukom kung aprobahan ba o dili ang protesta.

Base sa ulahing record sa Comelec sa buwan sa Oktubre 2009 mikabat sa 98, 653 ang rehistradong botante sa siyudad ug gilauman nga molapas pa ngadto sa 100,000 ang mobotar sa sunod tuig.

Matud ni Moran nga gi-consolidate nila ang tanang data ug ilaha kining i-transmit ngadto sa central office sa Manila. Ang siyudad dunay 6,501 nga mga bag-ong botante diin 1,299 ang mga transferee nga gikan sa laing mga dakbayan ug munisipalidad. 

Ug mikabat ngadto sa 47 ka tawo ang na-cancelled tungod kay mga patay na kini.

Base usab sa record sa Comelec ang Talisay adunay 558 ka mga presento ug mahimong 148 kung ma-clustered. (Brenda D. Batuto)    (BANATNEWS)