Public consultation sa BRT gisugdan

CEBU, Philippines - Mipahgayon na og inisyal nga public consultation ang City Planning and Development Coordinator sa Cebu City Hall nga si Paul Villarete ngadto sa tanang transport groups, lakip na ang mga PUJ drivers ug Operators kabahin sa ilang tinguha nga mapatuman ang Bus Rapid Transit (BRT).

Si Villarete atol sa 888 News Forum kagahapon nagkanayon nga sa samang higayon mipahigayon usab sila og kaugalingong pagtuon sa mga kadalanan dinhi sa dakbayan sa Sugbu nga posibleng maagian sa BRT.

Matud ni Villarete nga ang konsultasyon gihimo pagsuta kun uyon ba ang transport groups sanglit karung sunod buwan adunay dakong tigom nga himuon ang Regional Development Council (RDC) nga gipasiugdahan usab sa National Economic Development Authority (NEDA)-7. Apan sa iyang bahin si NEDA-7 regional director Marlene Rodriguez kinsa usa sa dinapit sa maong tigom nagkanayon nga wala maapil sa ilang agenda ang BRT sanglit hangtud karun wala pa siya makadawat og letter of endorsement gikan mismo sa kagamhanan sa dakbayan ug sa local nga kagamhanan sa Mandaue ug Talisay.

Gibutyag ni Villarete nga kinahanglan lang dugangan ang gilapdon sa kadalanang kaagian sa BRT ug kini magkinahanglan og tulo ngadto sa upat ka lanes nga one way. (Rey Pasaporte)    (BANATNEWS)