Polis nga 'misuyop' ipa-dismiss

CEBU, Philippines - Girekomendar sa Cebu Provincial Police Office (CPPO) sa Police Regional Office (PRO-7) nga tangtangon sa serbisyo si PO3 Fraksidy Abalo, sa Madridejos Police Station nga giingong nasakpang nagsuyop og shabu niadtong milabay’ng semana diha sa A. Lopez St., barangay Calamba ning dakbayan sa Sugbu.

Si Insp. Ruben Cuizon, imbestigador sa Provincial Investigation and Detection Group (PIDMB) mibutyag nga migawas sa pre-charge evaluation sa kasong administratiba batok kang PO3 Abalo nga dismissal ang silot niini.

Si Cuizon miingon nga bug-at ang mga ebidensiyang ilang gihuptan batok sa maong polis ug wala sad kini makapakita’g kongkretong rason nganong didto kini sa lugar nga nabaniog nang suyopanan sa mga drug addict ug nadakpan pa gyud sa Cebu City Police Office sa akto nga nagsuyop.

Subay niini gibutyag ni Cuizon nga dunay nag-ungot nga kasong serious neglect of duty niadtong milabay'ng tuig tungod sa Absent Without Official Leave (AWOL) ang maong polis ug karon gituki na sa PRO-7.

Nadakpan sa mga sakop sa San Nicolas Police Station si Abalo human nagsuyop uban sa iyang higala sa usa ka panimalay diha sa may Calamba nga nailang drug den ug nakuhaan og drug paraphernalia.

Hinuon ang maong police nakapiyansa human mapasakai og kaso, pabiling mihimakak ang maong polis sa mga alegasyon. (BANATNEWS)