2 tulisan nadis-armahan

CEBU, Philippines - Pakyas ang duha ka tulisan sa ilang laraw sa pagtulis sa usa ka taxi driver human kini madisarmahi sa ilang mga armas sa ilang gibiktima diha sa sitio Kagudoy sa barangay Basak dakbayan sa Lapulapu sa milabay'ng hapon. Ang biktimahon unta mao si Rolando Rosales Tampus, 41, residente sa Peace Valley, barangay Lahug dakbayan sa Sugbu nga driver sa Scorpion Taxi samtang ang mga tulisan daling nikaratel og panagan.

Base sa imbestigasyon ni SPO1 Honorato Inihao sa Crime Against Persons (homicide) nasayran nga mga alas 10:30 sa milabay'ng gabii duha ka mga lalaki ang misakay kang Tampus sa Poblacion dakbayan sa Lapulapu ug nagpahatod sa Camella Homes sa Bankal dakbayan sa Lapulapu.

Apan pag-abot sa maong dapit kalit mideklarar ang mga pasahero niini og tulis dayong tion sa kalibre .38 ngadto ni Tampus.

Si Tampus nga adunay abilidad sa pagdisarma nakiglayog sa duha ug pareho niya kining nailogan og armas, unang nailogan og armas sa biktima ang nagtion diha sa iyang likod ug sunod ang naa sa iyang tupad. Human mailogi og armas mikaratil og panganaog ug nanagan palayo sa maong dapit samtang giduso ni Tampus ang maong armas ngadto sa kapolisan sa dakbayan sa Lapulapu. (BANATNEWS)