Pagpasalba og armas sa polis may cover-up?

CEBU, Philippines - Andam ang mga lumolupyo sa F. Rallos St., nga mopirma og manifesto batok kang PO1 Gilbert Igot nga gikatahong nakapabuto sa iyang armas human sa away ni Manny Pacquiao ug Miguel Cotto sa balay sa kanhi mayor sa dakbayan nga si Eulogio ‘Yoyong’ Borres.

Dunay mga managlahing pamahayag ang mga residente kabahin sa hitabo, dunay miingong ang polis mipabuto sa iyang armas samtang ang uban mipasangil nga ang bayaw niini maoy mipunit sa armas nga gibilin niini sa lamesa dihang gibunal human matumba si Cotto.

Apan kun ang San Nicolas Police Station maoy pangutan-on base sa pangangkon sa maong polis, gikatahong nahagbong ang .45 kalibre armas niini atol sa pagbarog ug mibuto.

Si Christina Borres nagkanayon nga diha gyud sila sa atubangan samtang nagtan-aw sila'g telebisyon sa away ni Pacquiao ug Cotto dihang gibunal ni PO1 Igot ang iyang armas sa lamesa nga nasuko dihang natumba si Cotto.

Matud pa niini nga dunay daghang mga bata diha sa dapit, Sumala pa niini nga kun nibuto pa ang maong armas hayan dunay maigo kanila ingon man mga batang pwerteng daghana nga nagtapok sa panimalay ni   Borres.

Gihulagway niini nga bastos ug walay batasan ang maong polis kinsa kalit lang naabot sa lugar nga walay respeto kang Piskal Eulogio Borres Jr. nga diha sad sa sulod sa panimalay nagtan-aw.

Samtang si Wing Wang Jaca kinsa didto sa lugar miingon nga nakuratan sila pagbunal ni Igot sa armas sa lamesa ug kalit nga may usa ka buto sa armas nga ilang nadungog.

Laing residente sa lugar mibutyag nga human gibunal sa polis ang iyang armas mitalikod kini ug gipunit sa bayaw niini ang armas dayon gipabuto.

Si Igot gidakop ni Chief Insp. George Aniñon, apan nagduda ang mga residente nga dunay cover-up nga nahitabo sanglit wala gilayon gi-turnover ni Aniñon si Igot sa presinto kay gidala pa kini sa ilang panimalay.

Sa spot report sa San Nicolas Police Station, accidental firing ang nahitabo.

Kagahapon sa alas 4:45 sa hapon si PO3 Marcelino Sanchez, desk officer sa San Nicolas Police Station mibutyag sa Banat News nga gi-release na nila si Igot kay niabot na sa reglamentary period nga walay mipasaka og kaso batok niini . (BANATNEWS)