2 ka sala sa Palace of Justice sige kapagngan og kuryente

CEBU, Philippines - Duha ka mga huwes ang mireklamo sa pagkapalong sa suga sa ilang sala tungod sa pagkaputol sa linya sa kuryente nga nakaapektar sa pagpadayon sa pagbista sa mga kasong naa sa ilang tagsatagsa ka mga sala. Ang mireklamong naputlan og kuryente mao sila si RTC-7 Judge Eric Menchavez sa Branch 21 ug RTC-7 Judge Manuel Patalinghug. Si Judge Patalinghug mitug-an nga duha ka semana na silang nakasinating maputlan og kuryente ug kini mahitabo taliwala pa gyud nga duna sila'y gihusay nga kaso. Kagahapong adlawa dili momenus sa duha ka oras nga napagngan sila og suga hinungdan nga nigamit na lamang sila og kandila aron makapadayon sa ilang hearing. Matud pa ni Judge Patalinghug nga apektado kaayo ang iyang sala sa pagkaputol sa linya sa kuryente sa iyang sala apan bisan pa man niini iyang gipaningkamutan nga magpadayon sa iyang pagdungog sa mga kaso sa iyang sala gamit ang kandila.

Samtang ang mga staff ni Judge Menchavez miingon nga tungod sa pagkaputolputol sa kuryente, nangaguba ang ilang mga files nga gi-store sa computers. Ang Maintenance Section sa Palace of Justice pinaagi ni Engr. Sagani Saranillo mipahibawong naguba ang circuit breaker sa duha ka mga sala tungod sa kadugay na niini.

Ang mga tawo ni Saranillo nagkanayon nga naabot na og 20 ka tuig nga wala mailisi ang linya sa kuryente sa Palace of Justice ug dili na makapiog ang circuit tungod sa kadako na sa load sa kuryente kay daghan na ang naggamit og mga computers.

Hinuon gipasalig nila nga dalion nila og ayo ang maong nagubang circuit breaker. (BANATNEWS)