2 ka gi-salvage sa Naga wa pa mailhi

CEBU, Philippines - Pabiling wala mailhi sa kapulisan ang duha ka mga langyaw nga gituohang mga Koreano ug gituohang gi-salvage ug diha lang gilabay sa dumping site sa sitio Tres sa barangay Uling lungsod sa Naga niadtong Domingo sa alas 6:00 sa buntag.

Gibutyag ni SPO4 George Canumon, deputy chief ug imbestigador sa Naga police dihang nahinabi sa Banat News wala pay tagtungod nga nagpakisayod sa ilang buhatan nga nawad-an og kabanay ug bisan nalang pagtan-aw sa mga patay'ng lawas diha sa Saint Francis Funeral Homes sa N. Bacalso Avenue dakbayan sa Sugbu.

Gibutyag ni Canumon nga naglisud gyud sila pag-ila sa mga biktima tungod kay wala gyuy mga personal nga butang sama sa pitaka ug mga identification cards nga magtumbok sa ilang mga pangalan ug sa lugar nga ilang gipuy-an.

Nunot niini, nanawagan sila sa mga kabanay nga nawad-an og sakop sa ilang pamilya ug mga suod nga higala pagbisita sa punerarya sa pamasin og mao kini ang ilang gipangita.

Kagahapong adlawa gi-sentro sa kapulisan sa Naga ang pagpakig-alayon sa lain-laing lugar ingon man ang pagdangop sa Cebu Police Office (CPPO) ug Police Regional Office (PRO-7) aron matabangan pagsulbad sa nahitabong krimen.

Kombinsido si Canumon nga dili molupyo sa ilang lugar ang mga biktima ug gipatay nang daan sa laing lugar apan didto lang gilabay sa ilang dapit.

Ang kapulisan naglisud na pag-ila sa panagway sa mga biktima gawas lang nga kini mga langyaw ug gituohang mga Koreano tungod kay nabulit na sa dugo ang ilang nawong ug kalawasan nga naputos sa samad pinusilan sa lawas ug ulo ingon man daghang dinunggaban sa kalawasan.

Ang duha gipanggulgulan usab sa mga liog ug dunay daghang mga patik ang kalawasan nga naka-short ug naka -rubber shoes nga pulos naka sleeveless.

Hinuon matud ni Canumon usa ka multivan kolor yellow nga walay plate number ang ilaha karung gipangita nga maoy posibleng gisakyan sa mga biktima nga gilabay sa maong lugar.

Kini human dunay usa ka molupyo sa maong lugar ang mitug-an sa kapulisan nga nakit-an niya ang maong multivan nga yellow nianang pagka- Sabado sa alas 9:00 sa gabii nga mihunong sa maong lugar apan dihang nakabantay sa iyang presensya milarga kini dayon ug miirog paingon sa unahan diin makit-i pagkabuntag ang patay'ng lawas sa mga biktima dayung sibat paingon sa siyudad sa Toledo nga direksiyon.   (BANATNEWS)