Noynoy ug Mar nag-una sa survey

CEBU, Philippines - Nag-una karon sa labing uwahing resulta sa gihimong Pulse Asia survey nga mas daghan ang pabor kang Liberal Party presidential candidate Senador Benigno “Noynoy” Aquino tungod sa 44 porsiyento sa mga botante nga labaw og 25 porsiyentong margin kang Nacionalista Party standard-bearer Senador Manuel Villar nga nakakuha lang og 19 porsiyento sa report sa ABS-CBN News.

Sumala pa sa Pulse Asia ang rason nga mas daghan og pabor kang Aquino mao ang giingong limpyo niining public record ug giingong ‘dili kurakot.’ Sunod kang Villar mao si Senador Francisco “Chiz” Escudero nga nakakuha og 13 porsiyento.

Si kanhi presidente Joseph Estrada nakakuha usab og 11 porsiyento samtang si Bise Presidente Noli de Castro kun modagan pagkapangulo nakakuha og kwatro porsiyento.

Lakip sa gibotohan sa maong survey sila si Gilberto “Gibo” Teodoro nga nakakuha og dos porsiyento, si MMDA chairman Fernando Bayani ug Bro. Eddie Villanueva nakakuha og parehong uno porsiyento.

Samtang sa pagkabise-presidente migawas nga labaw usab og 14 porsiyentong margin si Senador Mar Roxas sa Liberal Party tungod sa nakuhang 37 porsiyentong botos itandi kang National People’s Coalition vice-presidential candidate Senador Loren Legarda nga nakakuha og 23 porsiyentong botos.

Samtang si Makati City Mayor Jejomar Binay, nga maoy running mate ni kanhi presidente Joseph Estrada, nagtabla ni incumbent Vice-President Noli de Castro sa ilang 13% ug 11% botos diha sa ikatulong pwesto.

Samtang si Lakas-Kampi-CMD's vice-presidential candidate, actor-TV host Edu Manzano, wala maapil sa maong survey sanglit uwahi naman kining napahibawong mokandidato.

Ang survey gihimo niadtong petsa 22 hangtud 30 sa bulan sa Oktubre kabahin sa kung si kinsa ang mas paboran sa mga botante kun gihimo pa ang eleksyon sa maong adlaw sa milabay'ng bulan.

Lakip sa migawas sa survey mao sila si Senador Jinggoy Estrada, Ramon 'Bong' Revilla nga nagtabla sa upat ka porsiyento matag usa, Metro Manila Development Authority (MMDA) chairman Bayani Fernando, Sen. Richard Gordon, Interior and Local Government Secretary Ronaldo Puno nagtabla sad sa one percent preference. (BANATNEWS)