Gwen mohatag gatas sa mga tiguwang
CEBU, Philippines - Kun si Cebu City Mayor Tomas Osmeña mihatag og P2 mil nga benepisyo sa mga Senior Citizen (SC) sa siyudad sa Sugbu matag tuig, si Governor Gwen Garcia manghatag usab og gatas, tsinilas ug mga eyeglasses ngadto sa mga SC sa lalawigan.
Sumala pa ni Provincial Treasurer Roy Salubre nga ang maong programa ni Gobernador Garcia naandan na niyang gipatuman matag tuig. Iyang gitataw nga ang Kapitolyo mogahin og dili mominus sa P1 milyon matag tuig aron ipamalit og gatas, tsinilas ug mga antiyohos alang sa kaliboan ka mga SC sa probinsiya sa Sugbu.
Si Provincial Social Welfare Officer, Marivic Garcis nagkanayon nga ang naasoy nga programa sa gobernador gitawag kini og "Halad sa Gugma alang kang Lolo ug Lola" nga gisabak sa kinatibuk-ang special program sa gobernador nga Government Working for Elderly Needs kon GWEN.
Sigun pa ni Garcis nga ang maong programa gitumong aron matabangan ang mga kabus nga SC sa nagkadaiyang lungsod ug component cities sa lalawigan pinaagi sa pakigdugtong sa mga Local Chief Executive, Integrated Provincial Health Office ug ubang mga opisyales sa Kapitolyo.
Matud pa ni Garcis nga ang probinsiya sa Sugbu mopahigayon og usa ka adlaw nga medical mission, libreng, medical and laboratory examinaton, eye check-up ug manghatag og tsinilas, powdered milk ug reading glasses sa mga tiguwang sa matag lungsod.
Gawas niini ang matag usa ka SC kahatagan usab og 2 ka kilo nga bugas gikan sa National Food Authority (NFA).
Apan giklaro niini nga ang makapahimulos sa programa sa gobernador mao kadtong nagpangidaron og 60 anyos ug may indentification card (ID) sa SC. – BANAT NEWS
- Latest
- Trending
