2 Koreano gipamatay, gilabay sa Naga

CEBU, Philippines - Duha ka langyaw nga gituohang mga Koreano brutal nga gipamatay pinaagi sa pagbulit og samad pinusilan ug dinunggaban sa kalawasan nila ug nanggawas pa ang tinai nga nakit-ang gilabay sa dumping site sa bukirang bahin sa Sitio Tres, barangay Uling, Naga kagahapon sa alas 6 sa buntag.

Si SPO4 George Canumon, imbestigador sa Naga Police Station mibutyag sa dihang nahinabi sa Banat News nga gituohan nilang niana pang pagka-alas 9 sa milabay’ng gabii gilabay ang mga patay’ng lawas sa duha ka langyaw.

Matud ni SPO4 Canumon nga naglisod ang mga imbestigador sa pag-ila sa mga ngalan ug pinuy-anan sa duha ka langyaw nga gituohan nilang mga Koreano kay gawas nga nabulit sa samad pinusilan ug dinunggaban ang kalawasan ug naligo sa dugo, wala kini mga pitaka ug bisan unsang butang sama sa ID diha sa ilang mga sapot.

Igo lang gihulagway ni SPO4 Canumon ang duha nga mga linginon og nawong.

Nagtuo ang kapolisan nga gipanggolgol ang liog sa duha. Ang usa nangatastas ang tiyan ug nanggawas ang tinai ug adunay upat ka samad pinusilan sa walang dughan, agtang ug duha sa bukobuko.

Samtang ang laing lawas nga nakit-an sa walog nga bahin sa dumping site unahan sa nahimutangan sa unang lawas, gihulagway nga taason og ilong ug adunay samad pinusilan sa walang bahin sa lawas, ubos sa dughan, sampot ug bukobuko ug adunay daghang dinunggaban sa kalawasan.

Ang duha ka langyaw pulos nagsul-ob og porontong nga short, ug pulos nagsul-ob og rubber shoes ug naka-long sleeve. Subay sa inisyal nga imbestigasyun sa kapolisan nga usa ka Marlon Oberes nga residente sa maong lugar mitug-an sa kapolisan nga nianang pagka-alas 9 sa gabii, usa ka multicab nga kolor yellow ang iyang nakit-an nga mihunong sa ibabaw’ng bahin sa dumping site, apan sa dihang nakabantay ang drayber sa iyang presensiya milarga kini ug milahos paingon sa sitio Tres sa unahan nga bahin diin nakaplagan ang mga patay’ng lawas.

Gituohan ni Oberes nga gikan sa siyudad sa Toledo ang maong multicab nga walay nakabutang nga plate number ug maoy gituohang naglabay sa mga patay’ng lawas.

Gipatay ang duha sa laing lugar, sumala sa kapolisan.

Nasayran nga ang lugar nga gilabayan sa mga biktima distansiya lang og gamay sa lugar diin mahimutang ang kabalayan.

Ang kapolisan padayon pa sa pag-imbestigar aron pag-ila sa nagpatay sa duha ka langyaw. – BANAT NEWS